Япон-Монголын хамтарсан компанийн 51 хувийг эзэмших Японы консорциумын төлөөлөгчдийг хүлээн авч уулзлаа.
Улаанбаатар хотын Олон улсын нисэх онгоцны шинэ буудлын үйл ажиллагааг эрхлэн явуулах Япон-Монголын хамтарсан компанийн 51 хувийг эзэмших Японы консорциумын төлөөлөгчдийг “Хөшигийн хөндийн нисэх онгоцны буудал” ТӨХХК-ийн Гүйцэтгэх захирал М.Гантөгс 2019 оны 01 дүгээр сарын 15-ны өдөр компанийн төв байранд хүлээн авч уулзлаа.
Уулзалтад Мицубиши корпорацын Нисэх буудлын бизнесийн үйл ажиллагааны менежментийн багийн туслах менежер Норико Кишикава, Нарита олон улсын нисэх онгоцны буудлын ахлах менежер Ёшида Норифуми, Жалюкс компанийн Нисэх онгоцны буудлын бизнесийг хөгжүүлэх хэлтсийн менежер Хироаки Сайто, Мицубиши корпорацын Улаанбаатар дахь Төлөөлөгчийн газрын дарга Хамажима Хироаки оролцлоо.
Энэ нь хамтарсан компанийн хувьцааг эзэмших талуудын анхны уулзалт бөгөөд уг уулзалтын хүрээнд Гүйцэтгэх захирал М.Гантөгс компанийн үйл ажиллагааны үндсэн чиглэл, чиг үүргийг танилцуулсан юм. Түүнчлэн талууд хэлэлцээний явц, хамтарсан компанийн бүтэц, бүрэлдэхүүн зэргийн талаар санал солилцож хамтын ажиллагааг улам нягт болгох үүднээс тогтмол уулзалт зохион байгуулж байхаар харилцан тохиролцов.
