Маргаашнаас буюу аравдугаар сарын 11-нээс эхлэн "Сингапур Эйрлайнс" компанийн “Airbus A350-900” агаарын хөлөг дэлхийн хамгийн хол замыг туулах, хамгийн урт нислэгийг үйлдэж эхлэх нь. Энэ нислэг нийт 16 мянга гаруй километрийг туулж Сингапураас Нью-Йорк хотод 19 цаг нисч хүрэх бөгөөд хөлөг бизнес ангиллын ердөө 100 суудалтай юм байна. Хэдийгээр энэ нислэгийг олон жилийн өмнө санаачилсан ч тухайн үед буюу 2013 онд үр ашиггүй гэж үзээд эхлүүлээгүй юм. Харин маргаашнаас эхлэх уг нислэг долоо хоногт гурван удаа “Newark Liberty” олон улсын нисэх буудалд хүрч байх нь ээ.

Тэгвэл бүтэн хоног шахам зогсохгүй үргэлжлэх энэ нислэгийн үеэр зорчигчдын тав тухыг хэрхэн хангах вэ? Энэ бол Австралийн Перт хотоос Лондон руу хүрдэг урт нислэгээс даруй гурван цагаар урт. Энэ асуудлыг шийдвэрлэхэд агаарын хөлгийн интерьер хариуцсан захирал Флорент Петтени хичээж ажилласан гэдгээ “CNN”-д хэлжээ. Онгоцны бүхээг өндөр таазтай, ухаалаг LED гэрэлтүүлэгтэй бөгөөд чимээ шуугиан нь ч бага ажээ. Түүнчлэн урт хугацааны нислэгт зориулж хөлгийг бүтээсэн учраас ашигласан материал нь хүртэл ялгаатай гэдгийг тэр онцлов. Түүнчлэн хөлгийн цонх нь панорам үзэмжтэй бөгөөд цонхны хажууд суудал авна гэж булаалдах шаардлагагүй гэнэ.

Энэ нислэгийг үйлдэж эхэлснээр дэлхийн хамгийн урт, тасралтгүй үргэлжилдэг нислэгийн жагсаалт шинэчлэгдэж байгааг танилцуулж байна.

ХАМГИЙН УРТ НИСЛЭГҮҮД

1.    Сингапур – Нью-Йорк – 16,700км

2.    Доха – Окланд – 14,259км

3.    Лондон – Перт – 14,496км

4.    Дубай – Окланд – 14,200км

5.    Лос-Анжелес – Сингапур – 14,113км

6.    Сидней – Хьюстон – 13,833км

7.    Сидней – Даллс – 13,837км

8.    Сан Франциско – Сингапур – 13,592км

9.    Атланта – Йоханесбург – 13,581км

Абу Даби – Лос Анжелес – 13,502км